Alfred Floki

Alfreð Flóki Nielsen (1939-1987) er án efa einn óvenjulegasti myndlistarmaður Íslendinga og flestir listfræðingar sammála um að erfitt er að staðsetja hann í íslenskri listasögu. Þar skipti án efa miklu máli að hann var aðeins nítján ára gamall þegar hann hélt til náms í Konunglega listaháskólanum í Kaupmannahöfn. Hann komst auðveldlega inn í skólann og lagði stund á nám við málaradeildina þar sem aðalkennari hans var listmálarinn prófessor Hjort Nielsen. Flóki hafði sterk tengsl við Danmörku en faðir hans, Alfreð Nielsen, var danskur í föðurætt. Hann naut einnig föðurfólks síns í ýmsu meðan hann dvaldi í Kaupmannahöfn.

Flóki leigði alltaf herbergi og bjó á ýmsum stöðum í Kaupmannahöfn. Best leið honum í gömlu húsi við Christianshavn.

Skindbuksen

Flóki var mikill gleðimaður og sótti mikið búlluna Skindbuksen (Skinnbuxurnar) sem eru rétt við Kongens Nytorv, sérstaklega árin 1962-1963. Þetta þótti heldur vafasamur hluti af Kaupmannahöfn á þeim árum en á þeim tíms svipaði Nýhöfn til St. Pauli hverfisins í Hamborg. Skinnbuxurnar voru í svokölluðu Minefelti en það er svæði í kringum Nicolaikirkjuna og þótti ekki fært betri borgurum. Skinnbuxurnar, Skindbuksen Anno 1728, var svöl kjallarbúlla í Lille Kongensgade við hliðina á Hviids Vinstue sem er fimm árum eldri. Þar kostaði skipperlabskovs (mergjuð kjötkássa) alltaf eina danska krónu. Á sunnudögum var hægt að fá þar danskt hádegisverðarborð á góðu verði en allt þetta var lagt niður síðar.

Þarna voru margir fastagestir, ýmist listamenn eða furðufuglar, nema hvortveggja væri. Þar má nefna skáldið Jens August Schade, Kirsten Kjær listmálara og lífskúnstner sem bjó reyndar í sama húsi uppi á lofti. Einnig má nefna rithöfundana Tove Ditlevsen og Otto Gelsted. Þá sótti Tryggvi Ólafsson listmálari þangað reglulega.

Sitt annað ár í Kaupmannahöfn, haustið 1959 bjó Flóki úti á Østerbro, í Olsengade 14 en þaðan var klukkutíma gangur í Akademíuna.

Faðir Flóka lést í Reykjavík 1961 og Flóki ílengist á Íslendi. Þegar hann heldur út aftur í byrjun árs 1962 er hann hættur í Akademíunni. Hann býr þá um tíma hjá vini sínum Zachariasi Heinesen (syni færeyska skáldsins). Eftir það bjó hann um skeið á pensjonati við Nýhöfn en síðan í Herluf Trollesgade. Gatan heitir eftir Herluf Trolle -- gamalli danskri sjóhetju. Þar bjó hann efst uppi á fimmtu hæð.

Ekki var dvölin þar lengi og næst flutti hann sig yfir í Tovegade. Þar bjó hann gluggalausu herbergisræksni uppi á hanabjálka. Veturinn sem hann bjó þar var honum oft kalt og svaf gjarnan í mörgum frökkum.

Á þeim tíma var ekkert Jónshús í Kaupmannahöfn. Þá hittust Íslendingar á svokölluðum Kannibal, sem var matstofa stúdenta í Nörregade. Þeir hittust þar alltaf á fimmtudagskvöldum, lásu blöð og drukku öl.

Frá Tovegade fluttist hann yfir í Stampesgade.

Árið 1967 flýtur Flóki ásamt danskri konu sinni, Annette, og syni yfir í heimabæ hennar, Næstved á Sjálandi. Þau skildu síðar og hann flutti alfarinn frá Næstved árið 1971. Fluttist hann þá inn til Helgu og Úlfs Hjörvars á Folksvarsvej á Fredriksberg. Þetta sama ár hélt hann sýningu í húsi Jóns Sigurðssonar í Kaupmannahöfn. Hann flutti þá á Sindshvilevej sem er hliðargata frá Falkonerallé.

Flóki kom alkomin heim frá Danmörku 1974 eftir velheppnaða sýningu í Gallerie Passepartout.

Heimild:
Nína Björk Árnadóttir: Ævintýrabókin um Alfreð Flóka. Forlagið 1992.